Somalia: Guddoonka Barlamanka oo xayiray safarrada Xildhibaanada
-
- Posted On 27-04-2016, 11:56PM
MUQDISHU- Gudoomiyaha Barlamanka Somalia Maxamed Sheekh Cusmaan Jawaari ayaa maanta [27 April, 2016] sheegay wixii hadda ka dambeeya inuusan jiri doonin Xildhibaan u bixi kara safar dalka dibaddiisa, isagoo ugu baaqay kuwa maqan inay dhaqso usoo xaadiraan.
Jawaari ayaa sidoo kale ka digay in mudanayaashu maqnaadaan kulamada muhiimka ah ee golaha shacabku yeeshaan isagoo xusay inay soo dhammaatay waqtigii la iska maqnaan jiray.
Gudoomiyuhu wuxuu amarkiisan u cuskaday howlo badan oo Barlamanka horyaalla isagoo sheegay in dhammaan Xildhibaanada saarantahay mas'uuliyad badan, dalkuna ku jiro marxalad kala guur ah.
Arrintan ayaa timi xilli maalmihii lasoo dhaafay mudanayaashan kulamo kala duwan uga socda xaruntooda Muqidishu, waxaana jiray xubno badan oo ka maqnaa fadhiyadaasi iyo kuwa jiray safarro dalka dibadiisa ah.
Barlamankan, ayaa waxaa u haray muddo kooban iyadoona u socda kalfadhigoodii 8-aad, waxaana la kala diri doonaan markuu soo dhamaado fadhigoodan dastuuriga ah.
GAROWEONLINE
