Soomaliya: Guddoomiyaha Barlamanka oo Baydhabo tagay
-
- Posted On 18-06-2016, 01:59PM
BAYDHABO, Somalia- Wafdi uu hogaaminayo Guddoomiyaha Barlamanka Soomaaliya, ayaa maanta gaaray magaalada Baydhabo xarunta gobolka Baay, waxaana halkaasi kusoo dhaweeyay mas'uuliyiin katirsan maamulka Koonfur Galbeed.
Socdaalka Maxamed Sheekh Cusmaan Jawaar, ayaa salka ku haya ka qayb galka shirka madasha wadatashiga Qaran ee Isniinta soo socota 20 Jun, lagu wado inuu ka furmaan magaaladaasi.
Wafdiga, waxaa qayb ka ah Xildhibaano katirsan Barlamanka Federaalka Soomaaliya.
Khudbad uu u jeediyay warbaahinta ayuu ku sheegay, Prof: Jawaari, inuu ku faraxsanyahay imaanshihiisa magaalada Baydhabo isagoo tilmaamay inay dhawan ka qayb gali doonaan shirka madasha wadatashiga Qaran.
Magaalada Baydhabo, ayaa amnigeed aad loo adkeeyay, waxaana socda qaban qaabo ku aadan shirkaasi iyadoo la filayo in maalmaha soo socda ay tagaan mas'uuliyiinta ugu sarraysa dowladda Federaalka iyo maamul goboleedyada.
Shirka dhici doona 20 Jun, 2016 ayaa diiradda lagu saari doonaa arrimo la xiriira doorashada dalka, waxaana isu imaatinkan lagu go'aamiyay shirkii dhawaan lagu soo gaba gabeeyay magaalada Muqdishu caasumadda Soomaaliya.
GAROWEONLINE
