Taliyaha ciidanka Somalia oo la kulmay saraakiisha AMISOM
-
- Posted On 05-01-2016, 04:47PM
05 January, 2016(GO)-Taliyaha ciidanka xoogga dalka Somalia Sareeya Gaas Maxamed Aaden Axmed oo wehiliyo abaanduulaha ciidanka iyo saraakiil kale ayaa la kulmay taliska ciidamada AMISOM ee Somalia.
Kulanka ayaa looga hadlay qaabkii la isaga kaashan lahaa howlgal ka dhan ah ururka Al-Shabaab kaasoo laga fuliyo Somalia sannadkan 2016, wuxuuna taliyuhu sheegay inay rajaynayaan dalka oo laga sifeeyay kooxaha argagixisada.
“Kulanka aynu maanta yeelannay ujeeddadiisu waa in wadajir loogu diyaar garoobo dib u xoreynta goobaha dhiman ee cadowgu joogo. Waxaan isla garanay AMISOM in sannadkan 2016-ka, Somalia oo dhan laga waayo meel ay Argagixiso ka taliyaan,” Ayuu yiri Taliyaha ciidamada xoogga Somalia.
Shirka saraakiisha ciidamada ayaa imaanaya xilli ay jiraan weeraro kooxda Al-Shabaab ka gaysanayso qaybo kamid ah Koonfurta Somalia kuwaas oo la beegsanayaan ciidanka dowladda iyo kuwa Kenya ee qaybta ka ah AMISOM.
GAROWEONLINE
