Wabiga Shabelle oo fatahaad ka sameeyey degmada Mahadaay
-
- Posted On 17-10-2015, 07:55AM
17 Octobar, 2015(GO)-Wararka ka imaanaya degmada Mahadaay ee gobolka Shabellada dhexe ayaa sheegaya in Roobab lixaad leh oo 24-kii saac ee lasoo dhaafay ka da’yey degmada sababeen fatahaad uu sameeyo wabiga Shabelle.
Gudoomiye ku-xigeenka degmada Mahadaay Ciidle Warsame Faarax oo warbaahinta la hadlay ayaa tilmaamay in Roobabku saamayn ku yeesheen isu socodka gaadiidka, isla markaana Wabigu fatahaada ka sameeyey dhowr meelood.
In ka badan 70 gaari oo nuuca xamuulka qaada ayaa goobaha fatahaadu saamaysay ku xaniban, iyagoo kusii jeeday gobollada dhexe ee Somalia.
Ilaa hadda majirto khasaaro fatahaadu gaysatay marka laga reebo xayiraada dhanka isusocodka.
Degmooyinka ay maraan Wabiyada Shabeelle iyo Jubba, waxaa ka socday diyaar garow xoogleh, ka dib warbixin sheegtay inay dhici karto duufaanta El nino.
GAROWEONLINE
