Wasiir Diini "xubnaha Al-shabab ka tirsan fursad ayey weli haystaan"
-
- Posted On 15-02-2015, 08:38AM
February 15, 2015- Wasiirka Gaashaan-dhigga Dowlada Federaalka Cabdiqaadir Sheekh Cali Diini ayaa baaq u diray dhallinyarada ka tirsan ururka Al-shabaab.
Diini oo waraysi gaar ah siiyey warbaahinta ku hadasha afka Dowlada Federaalka, wuxuu ugu baaqey xubnaha Al-shabaab inay nabada qaataan kana faa'iideystaan cafiskii horay Madaxweynuhu ugu fidiyey.
"waxaan dhallinyarada la qalday leeyahay haka qeyb qaateen dib u dhiska dalkooda, oo aysan ka qeyb qaadan bur burinta dalka, markasta waxa ay haystaan fursadda uu horey Madaxweynuhu u siiyay" ayuu yiri.
Dhanka kale, wuxuu fariin u direy ciidamada isagoo ku boorriyey inay shaqadooda sii laban laabaan islamarkaana dadaal badan geliyaan sidii ay ammaanka dalka u sugi lahaayeen ugana hortegi lahaayeen cid kasta oo nabadgelyada wax u dhimi karta.
Cabdiqaadir Sheekh Cali Diino oo horay usoo noqdey taliyaha ciidamada xoogga dalka, dhowaan ayaa loo soo magacaabay Wasiirka Gaashaan-dhigga.
GAROWE ONLINE
