Wasiirka arrimaha dibada UAE oo booqdey Muqdisho
-
- Posted On 08-06-2015, 12:35AM
Madaxweynaha dowlada Federaalka Somalia ayaa qaabiley wasiirka arrimaga dibada Imaraadka Carabta Sheikh Abdullah bin Zayed bin Sultan Al Nahyan iyo wafdi uu horkacayo oo maalintii Axadda June 8,2015 booqdey magaalada Muqdisho.
Xasan Shiikh ayaa dowlada Imaraadka Carabta uga mahad celiyey doorka ay ka qaadato tageerada ay u fidiso shacabka Somalia taasoo la xiriirta xaga bini'aadnimada iyo dhismaha kaabayaasha dhaqaalaha.
“Dowladda Somalia iyo shacabkeeda waxaa ku weyn, abaal weyna ay idin kaga hayaan, mashaariicda qiimaha leh ee dowladda Isutagga Imaaraadka Carabta ka fulinayso waddankan, waxayna taasi dhiirigelineysaa dadaalka ku aaddan dib u soo kabashada Somalia ee dhinacyada nabadgelyada, siyaasadda iyo dhaqaalaha”, ayuu yiri Madaxweynaha.
Wasiirka Arrimaha Dibedda ee Isutagga Imaaraadka Carabta, Sheikh Abdullah bin Zayed bin Sultan Al Nahyan ayaa dhankiisa ka mahadceliyey sida loogu soo dhoweeyey dalka Somalia isaga oo shegeey in xiriirka labada shacab yahay mid taariikhi ah.
Booqashadaan ayaa ah middi ugu horeysay ee wasiir ka tirsan dowlada Imaraadka Carabta ku tago dalka Somalia tan iyo intii Somalia bilowdey kasoo kabashada dagaalada sokeeye.
Labada dhinaca ayaa waxaa dhexmarey kulamo labo geesood ah kuwaasoo ay ka qayb galeen wasiirada dowlada Federaalka Somalia.
GAROWEONLINE
