Xasan Shiikh: fursad labaad ayaan siinay xubnaha Al-shabab
-
- Posted On 27-10-2014, 01:20PM
October 27, 2014 (GO) - Madaxweynaha Dowlada Federaalka Xasan Shiikh Maxamuud ayaa sheegay in dowladu kordhisay waqtigii horay loogu qabtay xubnaha ka tirsan Al-shabaab ee kooxdaas kasoo baxa in cafis loo fidin doono.
Isagoo maanta ka hadlayey munaasabad ka dhacday xarunta Wasaaradda Gaashaan-dhigga ee Muqdisho oo lagu taageerayey guulaha ciidamada Dowlada Federaalka iyo kuwa AMISOM todobaadyadii u dambeeyey gaareen, Madaxweyne Xasan wuxuu sheegay in dowladdu lixdan maalmood ku kordhisay waqtidii cafiska.
Dhanka kale wuxuu sheegay in dowladda uu hogaamiyo ay ka go'an tahay sidii ciidamada qalabka sidaa daryeel iyo xuquuq fiican u heli lahaayeen, isagoo ballan qaaday in dhamaan baahiyaha ciidanka wixii la awoodi karo aan waxba laga hagaran doonin.
Hawlgalka loogu magac daray Badweynta Hindiya ayaa mudadii uu socdey ciidamada Dowlada Federaalka iyo kuwa AMISOM waxay ku guuleysteen inay la wareegaan deegaano badan oo horay kooxda Al-shabab uga talin jirtey.
Hadalka Madaxweyne Xasan ayaa kusoo aadaya xilli uu khilaaf xoogani soo kala dhex galay isaga iyo wasiirka koowaad ee xukuumadda Federaalka Cabdiweli Shiikh Axmed.
GAROWE ONLINE
