Elon Musk oo Internet-ka ka jaray Uganda kahor doorashadda

KAMPALA - Shirkadda internet-ka ee Starlink ee uu leeyahay Elon Musk ayaa ku dhowaaqday inay xannibaad ku soo rogtay adeeggeedii laga isticmaalayay dalka Uganda, ka dib markii ay cadaadis kala kulantay hay’adda isgaadhsiinta dalkaas ee UCC.

Warqad ka soo baxday shirkadda Starlink 2-dii bishan Jannaayo, 2026, ayaa lagu sheegay in shirkaddu aysan haysan ruqsad rasmi ah oo ay kaga shaqayso Uganda, qalabka dadku isticmaalayaanna si sharci-darro ah looga soo geliyay dalalka deriska ah. Si loogu hoggaansamo amarka dawladda, shirkaddu waxay isticmaashay farsamo dadka u diidaysa inay internet-ka ka helaan gudaha Uganda.

Tallaabadan ayaa dhalisay dood xooggan iyo cadho ka timid dhanka xisbiyada mucaaradka iyo dadka u dooda xuquuqda aadanaha. Waxay ku soo beegantay xilli aad u xasaasi ah, maadaama dalka Uganda ay ka dhacayso doorasho madaxtinnimo 15-ka bishan Jannaayo.

Hoggaamiyaha mucaaradka, Bobi Wine, ayaa si kulul u dhaliilay go’aankan, isagoo sheegay in dawladdu ay doonayso inay xaddiddo isgaadhsiinta madax-bannaan si ay u saamayso hufnaanta doorashada. Wuxuu dalbaday in si degdeg ah dib loogu soo celiyo adeeggaas si shacabku u helaan macluumaad madax-bannaan.

Dhinaceeda, Starlink waxay sheegtay inay diyaar u tahay inay wadahadal la gasho dawladda Uganda si ay mustaqbalka u hesho oggolaansho sharci ah oo ay dalkaas kaga hawlgasho.

GAROWE ONLINE