Kenya oo dib u qabatay Maxaabiis Al-Shabaab oo baxsad ahaa [Sawirro]

NAIROBI, Kenya - Saddexda eedeysane oo u xirnaa falal argagixisanimada oo Axadii lasoo dhaafay ka baxsaday xabsiga Kamiti Maximum ayaa Maanta lagu xiray degaanka Mwingi, ee gobolka Kitui oo katirsan bariga Kenya.

Saddexda qof oo lagu kala magacaabo Musharraf Abdalla, Joseph Juma iyo Maxamed Cali ayaa la qabtay xilli ay ku sii jeedeen Gaarisa, oo ay uga sii gudbi lahaayeen dalka Soomaaliya.

Sawir iyaga oo gacmaha ka xiran ayaa isla markiiba la faafiyay. Waxay 15-kii bishan ka baxsadeen xabi ku yaalla Nairobi, oo lagu hayay.

Madaxa hay'adda dembi baarista Kenya ee [DCI] George Kinoti ayaa xaqiijiyay xariga, waxaana uu intaa ku daray in la keenayo Nairobi, oo maxkamadeyntooda ka socotay.

DCI waxay dul dhigtay $20 milyan oo dollar oo abaal-marin ahaan loo balan-qaadey qofkii soo sheega xog horseedaysa dib-usoo-qabashadooda.

Ma cadda in dadka hadda soo sheegay la siin doono abaal-marinta la duldhigay saddexda qof ee lasoo qabtay.

Baxsashadooda ayaa sababtay in xabsiga loo taxaabo 13 askari oo ka tirsan Ciidamada ilaalada ka ah Xabsiga, waxaana sidoo kale isbedel weyn lagu sameeyay xabsiyada Kenya iyo taliskooda.

Uhuru ayaa xilka ka qaadey taliyaha Xabsiyada dalka Kenya, oo lagu eedeeyay dayacaad iyo inuu ku lug leeyahay in raggan ay ka baxsadeen Xabsiga.

GAROWE ONLINE