Booliska Nairobi oo qabtay walxo qaraxyada loo adeegsado
-
- Posted On 15-12-2014, 10:32AM
December 15, 2014 (GO)- Booliska ayaa goor hore oo saaka ahayd muddo kooban xiray mid kamid ah jidadka muhiimka ah ee magaalada Nairobi, kadib markii lagu arkay walxo qaraxyada loo adeegsado.
Jidka boolisku xireen oo lagu magacaabo Juja wuxuu dhex maraa xaafadda Soomaalidu ku badan tahay ee Eastleigh.
Saraakiisha booliska ayaa sheegay inay baaritaan ku wadaan walxaha ay saaka heleen iyo weliba ciddii halkaas dhigtay.
Ammaanka dalka Kenya ayaa soo xumaanayey laga soo bilaabo bishii October sannadkii 2011, markaas oo cutubyo ka tirsan militeriga Kenya usoo tallaabeen dhinaca Soomaaliya.
Kenya ayaa soo gelitaanka ciidankeeda ee Soomaaliya ku sababeysey inay tahay si ay ula dagaallamaan Al-shabaab, oo sida Kenya sheegtay khatar geliyey dhaqaalaheeda iyo weliba ammaanka muwaadiniinteeda.
Al-shabaab ayaa sheegtay mas'uuliyadda weerarro khasaare badan dhaliyey oo ka dhacay gudaha Kenya, sidoo kale Al-shabaab ayaa ku goodidey inay sii wadi doonto weerarada tan iyo inta Kenya ciidamadeeda dib ugala soo baxayso Soomaaliya.
GAROWE ONLINE
