Diyaaradaha Israel oo duqeyn ka geystey Marinka Gaza
-
- Posted On 20-12-2014, 03:55AM
December 20, 2014 (GO)- Diyaaradaha dagaalka Israel ayaa goor hore oo saaka ah duqeeyey bartilmaameedyo ku yaalla Marinka Gaza ee dhulka Falastiin.
Duqeyntan oo sida Israel sheegtay jawaab u ah gantaal shalay oo Jimce ahayd laga soo tuuray dhanka Falastiin waxay noqonaysaa tii ugu horeysey kadib dagaalkii 50ka maalmood socdey ee afar bilood kahor dhex maray Israel iyo Xamaas.
Goob joogaaal ku sugan Mariga Gaza ayaa u sheegay telefishinka Al-jazeera in diyaaradaha Israel ee noocoodu yahay f16 saddex gantaal kusoo rideen xarumo ururka Xamaas ku leeyahay magaalada Khan Yoonis, inkastoo cidna aysan duqeyntaas wax ku noqon.
Dowlada Masar ayaa bishii August ee lasoo dhaafay ku guuleysatey inay xabad joojin kala dhex dhigto Israel iyo Xamaas kadib dagaal muddo 50 maalmood ah soconayey islamarkaana galaaftay nolosha 2,140 oo Falastiiniyiin ah iyo 73 Israel u dhashay badankooduna askar ahaayeen.
GAROWE ONLINE
