Hoggaamiyaha Cusub ee Iiraan Oo Fariin U Diray Dalalka Gobolka

Telefishinka dowladda Iiraan ayaa baahiyay qoraal ay sheegeen inuu kasoo baxay hoggaamiyaha cusub ee dalka, Mojtaba Khamenei, kaasoo fariin ku saabsan xaaladda dagaalka iyo xiriirka gobolka ku socota.

Qoraalka ayaa lagu sheegay in weerarrada ay Iiraan wado ay ku wajahan yihiin saldhigyada ciidamada Mareykanka ee ku yaalla dalalka ku xeeran, isla markaana Tehran ay aaminsan tahay in saldhigyadaasi ay sabab u yihiin xiisadda gobolka.

“Waxaan fariin u diraynaa hoggaamiyeyaasha dalalka gobolka, waxaanan adkaynaynaa inaan rabno xiriir wanaagsan oo aan la yeelanno waddamada nagu hareeraysan,” ayaa lagu yiri bayaanka.

Hase yeeshee qoraalka ayaa sidoo kale si cad u sheegay in joogitaanka ciidamada Mareykanka ee qaar ka mid ah dalalkaas uusan faa’iido u lahayn gobolka.

“Jiritaanka saldhigyada Mareykanka ee dalalkan qaarkood iyo in laga adeegsado weerarro lagu qaado Iiraan ma ahan mid dan u ah gobolka, sidaas darteed waa in la xiraa,” ayaa lagu yiri bayaanka.

Bayaanka ayaa intaas ku daray in Iiraan aysan isu arkin cadowga dalalka deriska ah.

“Sida aan hore u sheegnay, annagu cadow uma nihin dalalka nagu hareeraysan, balse waxa aan beegsaneynaa oo keliya saldhigyada Mareykanka.”

Qoraalka ayaa sidoo kale tilmaamay in xiritaanka Marinka Hormuz uu weli ahaan doono mid Iiraan u adeegsan karto cadaadis ku wajahan Mareykanka iyo Israa’iil.

Bayaankan ma uusan si toos ah uga soo muuqan Mojtaba Khamenei, balse waxaa akhriyay weriye ka tirsan telefishinka dowladda Iiraan, kaasoo sheegay inuu yahay fariin rasmi ah oo ka timid hoggaamiyaha cusub ee dalka.

GAROWE ONLINE