Iran: "Haddii Israel Markale Nasoo Weerarto, Xitaa Maraykanka Ma Badbaadin doono Netanyahu"

Tehran – Taliyaha Guud ee Ciidamada Iiraan, Abdolrahim Mousavi, ayaa si adag uga hadlay xaaladda colaadeed ee ka taagan gobolka, isagoo ku hanjabay in haddii Israel mar kale weerar ku qaaddo Iiraan, xitaa taageerada Maraykanka aysan badbaadin karin Ra’iisul Wasaaraha Israel, Benjamin Netanyahu.

Mousavi oo hadalkiisa ka jeediyay shir militari ayaa sheegay in awoodda difaaca iyo jawaabta militari ee Iiraan ay tahay mid xoogan oo aan la dafiri karin, taasoo ka dhigaysa in Israel aysan si sahlan u qaadi karin tallaabooyin militari oo ka dhan ah dalkaas.

“Israel haddii ay mar kale nagu soo weerarto, waxay wajihi doontaa cawaaqib culus oo aan marnaba la qiyaasi karin. Xitaa taageerada Maraykanka ma badbaadin karto Netanyahu,” ayuu yiri Taliyaha Guud.

Hadalkan ayaa kusoo aadaya iyadoo xiisadaha u dhexeeya Israel iyo Iiraan ay sii kordhayaan, kadib markii dagaallo iyo weeraro isdhaafsi ah ay ka dhaceen gobolka. Iiraan ayaa si joogto ah u cambaareysa tallaabooyinka militari ee Israel ee lagu weeraro goobo ku yaalla gudaha Iiraan iyo dalal deris ah.

Dhanka kale, Maraykanku waxa uu marar badan ku baaqay in la xakameeyo xiisadaha, isagoo taageeraya Israel, laakiin sidoo kale ku baaqaya in laga fogaado dagaal ballaaran oo gobolka ah.

Mousavi ayaa hadalkiisa ku tilmaamay digniin cad oo ku wajahan Israel iyo xulafadeeda, isagoo ku adkeystay in Iiraan ay diyaar u tahay inay difaacdo madax-bannaanideeda iyo danaha qaranka.

Wararka noocan oo kale ah ayaa sii hurin kara xiisadaha siyaasadeed iyo militariga ee gobolka, iyadoo caalamku uu si weyn u eegayo xaaladda sii adkaaneysa ee Bariga Dhexe.

GAROWE ONLInE