Japan oo markii ugu horreysay yeelatay Ra’iisul Wasaare dumar ah

TOKYO — Xisbiga haya talada Japan ayaa Sabtidii doortay Sanae Takaichi inay noqoto hoggaamiyahooda cusub, taas oo u gogol xaaraysa inay noqoto ra’iisul wasaarihii ugu horreeyay ee dumar ah ee dalkaas, oo ah saaxiib dhow oo Mareykanka ah.

Takaichi ayaa ku guuleysatay wareeggii labaad ee doorashada hogaanka Xisbiga Dimuqraadiga Xorta ah (LDP) kadib markii ay ka adkaatay Shinjiro Koizumi codad gaaraya 185 ilaa 156. Xisbiga LDP oo ah mid garab midig ah ayaa Japan xukumayay si joogto ah tan iyo dhammaadkii Dagaalkii Labaad ee Adduunka.

Tartanka hoggaanka xisbiga ayaa yimid kadib markii Ra’iisul Wasaare Shigeru Ishiba uu bishii hore shaaciyay inuu xilka ka degayo, kadib hal sano oo uu xafiiska joogay. Inkasta oo Takaichi ay tahay tan ugu dhow ee beddeli karta Ishiba marka baarlamaanka codka dhiibto dhamaadka bishan, haddana arrintaasi ma aha mid la hubo maadaama isbaheysiga LDP uu lumiyay aqlabiyadda labada aqal ee baarlamaanka sanadkii la soo dhaafay.

“Xilligan farxad ma dareemayo, balse waxaan si dhab ah u aaminsanahay in tartanku hadda bilaabanayo,” ayay tiri Takaichi khudbadeedii guusha. “Waxaan wajahnaa shaqo aad u badan oo aan si wadajir ah u qaban doono.”

Takaichi ayaa sidoo kale sheegtay in ay doonayso in ay dib u soo noolayso sumcadda xisbiga LDP, kaasoo la daalaa dhacayay fadeexado musuqmaasuq ah. “Waa inaan ka dhigno xisbiga mid firfircoon oo dadka ka beddela walwalka una beddela rajo,” ayay tiri.

Takaichi, oo 64 jir ah, waa siyaasi xag-jir ah oo sheegta in Margaret Thatcher, hogaamiyihii hore ee UK, ay tahay halyeeygeeda siyaasadeed. Waxay sidoo kale ahayd xulafo dhow oo uu lahaa Shinzo Abe, ra’iisul wasaarihii ugu waqtiga dheeraa ee Japan, kaasoo la dilay sanadkii 2022.

In kasta oo xubno badan oo xisbiga ka tirsan ay soo dhoweeyeen doorashadeeda, haddana waxaa jira walaac laga qabo in aragtiyaheeda qaranimo ee taariikhiga ah ay keeni karaan xiisad kala dhaxeysa dalalka dariska sida Shiinaha iyo Koonfurta Kuuriya.

“Beijing waxay si adag uga soo horjeesan doontaa mowqifyada Takaichi ee ah in dib loo eego dastuurka nabadeed ee Japan, la xoojiyo amniga badda, lana taageero Taiwan,” ayuu yiri Leif-Eric Easley, oo ah bare caalami ah oo ka tirsan Jaamacadda Ewha Womans ee Seoul.

Mid ka mid ah mudnaanta ugu sarreysa ee horyaalla ra’iisul wasaaraha cusub ee Japan ayaa noqon doona fulinta heshiiska ganacsi ee bishii Luulyo ay la galeen xukuumaddii Trump ee Mareykanka. Heshiiskaas ayaa dhigaya in la saaro 15% canshuur ah badeecadaha Japan, gaar ahaan gawaarida — hase yeeshee ilaa iyo hadda ma jiro heshiis rasmi ah oo la saxiixay.

Takaichi ayaa muujisay in ay dib u furi karto wada-xaajoodyada heshiiskaas, iyadoo tilmaamtay in Japan ay ballan qaaday in ay $550 bilyan ku maalgelinayso gudaha Mareykanka.

GAROWE ONLINE