Masar oo Soo Dhawaysay Balanqaadka Trump ee xalinta Khilaafka Webiga Nile

Qaahira - Masar ayaa si diirran u soo dhawaysay hadalka Madaxweyne Donald Trump oo sheegay inuu doonayo in uu dhex-dhexaadiyo khilaafka kala dhexeeya Itoobiya ee ku saabsan biyo-xireenka GERD. Trump ayaa sheegay in Masar ay xaq u leedahay biyaha Nile, isagoo dhaleeceeyay damka Itoobiya.

Diblomaasiyiin iyo falanqeeyayaal Masri ah ayaa si diirran u soo dhaweeyay hadallo uu jeediyay Madaxweynaha Mareykanka Donald Trump oo ku saabsan rabitaankiisa ah in uu fududeeyo xal laga gaaro muranka u dhexeeya Masar iyo Itoobiya ee ku saabsan biyo-xireenka weyn ee Itoobiya ka dhiseyso wabiga Buluunka ee ah laanta ugu weyn ee webiga Nile, taasoo ah isha ugu muhiimsan ee biyaha nadiifka ah ee Masar.

Madaxweyne Trump, oo Isniintii la hadlayay Xoghayaha Guud ee NATO Jens Stoltenberg isagoo ku sugnaa Aqalka Cad, ayaa carabka ku adkeeyay muhiimadda biyaha webiga Nile ay u leeyihiin Masar.

"Haddii aan Masar ahay, waxaan doonayaa in aan helo biyo ka yimaada Nile, waana ka shaqaynaynaa arrintaas," ayuu Trump yiri.

Madaxweynuhu wuxuu si kulul u dhaliilay mashruuca biyo-xireenka Itoobiya, isagoo xusay in uu xannibayo biyihii webiga Nile, wuxuuna xusay in Masar ay ku tiirsan tahay webigaasi in ka badan 97% baahideeda biyaha nadiifka ah.

Trump wuxuu ballanqaaday inuu ku dadaali doono xal laga gaaro khilaafka u dhexeeya Qaahira iyo Addis Ababa ee ku saabsan mashruuca biyo-xireenka, oo si rasmi ah loogu yaqaan Biyo-xireenka Horumarka Itoobiya ee Weyn (GERD).

Tani waxay ahayd markii labaad ee Madaxweyne Trump uu si toos ah uga hadlo muranka u dhexeeya Masar iyo Itoobiya muddo bil gudaheed ah. Horraantii bishii Juun, wuxuu ku eedeeyay hoggaamiyayaashii hore ee Mareykanka in ay maalgelin ku sameeyeen mashruuca Itoobiya, isagoo sheegay in uu dhaawacayo danaha biyaha Masar.

Mashruuca GERD ayaa tan iyo markii la bilaabay 2011-ka noqday il muran weyn u dhaxaysa Masar iyo Itoobiya. Qaahira waxay dooneysay in la saxiixo heshiis sharci ah oo lagu nidaaminayo buuxinta iyo howlgalinta biyo-xireenka, balse dadaallo wadaxaajood oo socday muddo 12 sano ah – oo ay qeyb ka tahay Suudaan – wax natiijo ah ma aysan keenin.

Masar waxay ku eedaysay Itoobiya in ay si kelinimo ah u dhaqantay, iyadoo jebisay heshiiskii Mabaa'diida ee 2015, kana indho-tiratay walaacyada Masar.

Wadahadalladii Biyo-xireenka oo Burburay

Bishii Diseembar 2023, Masar waxay si rasmi ah uga baxday wadahadalladii, iyadoo ku tilmaantay fashil, waxayna ku eedaysay Itoobiya in ay si ula kac ah u lumisay waqtiga ilaa mashruucu uu xaqiiqo noqdo.

Si kastaba ha ahaatee, muranka biyo-xireenka ayaa mar kale soo ifbaxay toddobaadyadii la soo dhaafay, gaar ahaan kaddib hadalladii Madaxweyne Trump ee bishii Juun, taasoo si weyn u soo celisay xiisaddii arrintaasi.

GAROWE ONLINE