Maxkamad diiday codsiga Netanyahu ee hakinta dhagaysiga dacwad musuqmaasuq

Qudus – Maxkamadda degmada Qudus ayaa Khamiistii diiday codsi ka yimid Ra’iisul Wasaaraha Israa’iil, Benjamin Netanyahu, oo ahaa in dib loo dhigo dhagaysiga dacwadda musuqmaasuq ee ka dhanka ah, isaga oo sheegay in uu u baahanyahay in uu diiradda saaro arrimaha amniga kadib dagaalkii 12-ka maalmood socday ee u dhexeeyay Israa’iil iyo Iiraan.

Qareenka Netanyahu ayaa maxkamadda ka codsaday in loo dhaafo dhagaysiga toddobaadyada soo socda, hase yeeshee garsoorayaashu waxay ku gacan seereen codsigaasi, iyaga oo ku tilmaamay mid aan lahayn “sabab sax ah ama faahfaahin sharciyeed oo qancin karta baajinta dhagaysiyada.”

Maxkamaddu waxay qoraalkeeda ku sheegtay: “Codsigan, sida uu yahay hadda, ma bixinayo saldhig sharci ah ama caddayn faahfaahsan oo u suurtagelin karta in la baajiyo dhagaysiyada.”

Netanyahu, oo beeniyay eedeymaha loo haysto, ayaa sheegaya in dacwaddan ay tahay mid siyaasadeed, halka taageerayaashiisuna ay ku tilmaameen “dhagar siyaasadeed oo looga gol leeyahay in lagu beegsado.”

Dacwadda koowaad, Netanyahu iyo xaaskiisa Sara ayaa lagu eedeeyay in ay ka heleen taajiriin hanti badan oo lagu qiyaasay $260,000 – oo isugu jirta sigaarka qaaliga ah, dahabka, iyo champagne – si ay ugu helaan dano siyaasadeed.

Dacwadaha kale, Netanyahu waxa lagu eedeeyay in uu isku dayay in uu la gorgortamo laba warbaahin oo Israa’iili ah si ay u siiyaan warar togan oo isaga ku saabsan.

Madaxweynihii hore ee Mareykanka, Donald Trump, ayaa Arbacadii ku tilmaamay dacwadda Netanyahu “dabo-gal siyaasadeed”, isaga oo ku baaqay in la joojiyo isla markaana “cafis degdeg ah” loo fidiyo, isaga oo Netanyahu ku sifeeyay “halyeey weyn oo la cafinayo.”

GAROWE ONLINE