MBS: Israel waxay ku riixaysaa Mareykanka inuu galo dagaalka Iran

RIYADH — Dhaxal-sugaha Sacuudiga, Maxamed bin Salmaan (MBS), ayaa sheegay in Israel ay ku jirto dadaal ay ku doonayso inay Mareykanka ku riixdo inuu si toos ah uga qayb galo dagaal Iran.

MBS ayaa tilmaamay in tallaabooyinka Israel ay qaadeyso ay halis gelinayaan xasilloonida gobolka Bariga Dhexe, isla markaana ay keenayaan khatar weyn oo ka dhalan karta iska hor imaad militari oo baahsan.

Hadalkan ayaa imanaya xilli colaadda u dhexeysa Iran iyo Israel ay sii kordhayso, iyadoo labada dhinac ay is-dhaafsanayaan weeraro iyo hanjabaado isdhaafsan.

Beesha caalamka ayaa ku baaqaysa in labada dhinac ay qaataan tallaabooyin lagu yareynayo xiisadda si looga fogaado dagaal ballaaran.

Sannadihii u dambeeyay, weeraro isdaba joog ah iyo hanjabaado ayaa ka dhacay labada dhinac, taasoo kor u qaaday cabsi laga qabo in khilaafka uu isu beddelo dagaal weyn.

Bariga Dhexe waa marin muhiim ah oo laga dhoofiyo shidaalka caalamiga ah. Xiisadaha iyo dagaallada ayaa saameyn ku yeelan kara sicir-bararka shidaalka, taasoo dunida oo dhan saameyn karta.

Xaaladda ayaa weli ah mid aad u kacsan, iyadoo beesha caalamka ay ku baaqayaan in la helo wadahadal iyo xal siyaasadeed oo lagu joojinayo xiisadaha, si looga fogaado dagaal ba’an oo gobolka waxyeello u geysta.

GAROWE ONLINE