Muxuu Abiy Axmed kala hadlay Putin?

MOSCOW - Ra’iisul Wasaaraha Itoobiya Abiy Axmed ayaa Madaxweynaha Ruushka Vladimir Putin la yeeshay wada-hadallo qoto-dheeraa intii lagu guda jiray kulanka BRICS. 

Labada hogaamiye ayaa ka wada hadlay arrimo badan oo ay ka mid yihiin kor u qaadista xiriirka laba geesoodka ah ee u dhaxeeya Itoobiya iyo Ruushka, kaasoo ku qotoma danaha ay wadaagaan, sida ganacsiga iyo maalgashiga.

Ra’iisul wasaare Abiy ayaa ku nuux-nuuxsaday muhiimadda uu leeyahay xiriirka xooggan ee taariikhiga ah ee ka dhexeeya labada dal, isagoo sheegay in xiriirku uu sii kobcayo.

Waxa kale oo uu iftiimiyay suurtogalnimada in la balaariyo iskaashiga dhaqaale iyada oo loo marayo BRICS, oo ah madal dhaqaalahoodu soo korayo oo ay Itoobiya iyo Ruushkuba xubno ka yihiin.

Itoobiya ayaa dhawaan ku biirtay BRICS, iyadoo Abiy Axmed markii ugu horeysay ka qeybgalay Shirka Ururka oo lagu qabtay dalka Ruushka. Xubnaha kale ee cusub waxaa kamid ah Masar iyo Imaaraadka Carabta.

Ruushka ayaa aad u danaynaya hadda arrimaha Afrika, iyadoo Putin kulamo gaargaar ah la yeeshay Al-Siisi iyo Abiy Axmed oo khilaaf u dhaxeeyo, waxaana xiisadda u dhaxaysa labadooda dal salka ku haysaa biyaha webiga Nile.

GAROWE ONLINE