Soomaaliya oo kamid noqotay 75 dal oo saameeyay go'aan cusub oo Trump soo saaray

WASHINGTON — Dowladda Maraykanka ayaa shaacisay in ay si aan waqti cayiman lahayn u joojisay bixinta fiisooyinka socdaalka ee muwaadiniinta 75 dal, oo ay Soomaaliya ku jirto, tallaabo ay sheegtay Waaxda Arrimaha Dibadda ee dalkaas oo qayb ka ah xeerar adag oo cusub oo ku saabsan socdaalka.

Si waafaqsan siyaasaddan, laga bilaabo 21-ka Janaayo, fiisooyinka socdaalka ee dalalka la sheegay lama ogolaan doono inta lagu guda jiro dib-u-eegista hababka baarista iyo hubinta amniga, iyadoo muwaadiniinta dalalkan ay wali codsan karaan fiisada, laakiin aan la siin doonin ilaa dib-u-eegista la dhameeyo.

Liiska dalalka waxaa ku jira waddamo ka kala tirsan qaaradaha Afrika, Aasiya, Latin America, Bariga Dhexe iyo Yurub. Soomaaliya waxaa ka mid ah dalalka ay saamaysay, sidoo kale waxaa ku jira Afghanistan, Iran, Ruushka, Masar, Nigeria, Suudaan, Suuriya, Tanzania, Uganda iyo Yemen.

Waaxda Arrimaha Dibadda ayaa sheegtay in tallaabadan looga gol leeyahay in la xakameeyo dadka ajnabiga ah ee laga yaabo in ay ku tiirsanaadaan gacan-ka-yaaadka bulshada Maraykanka. Joojintan ayaa khuseysa oo kaliya fiisooyinka socdaalka, mana saameyneyso fiisooyinka dalxiiska, ganacsiga ama waxbarashada. Waxaa laga yaabaa in laga dhaafo muwaadiniinta haysta dhalashooyin kale oo ka soo jeeda dalal aan ku jirin liiska.

Tallaabadan ayaa saameyn ku yeelan doonta qoysaska, ardayda iyo kuwa kale ee damacsan in ay u guuraan Maraykanka muddo dheer, inkastoo fiisooyinka hore loo siiyay ay sii ahaan doonaan kuwo ansax ah ilaa ay dhacaan. Kooxaha xuquuqda aadanaha iyo qaar ka mid ah dawladaha ayaa tallaabadan ku tilmaamay mid takoorka ah oo dhaawici karta xiriirka diblomaasiyadeed.

Shaacinta joojintan ayaa ku soo beegmaysa xilli maamulka Maraykanka uu sii adkeeyay xeerarka socdaalka iyo hababka codsiga magangalyada iyo fiisooyinka.

GAROWE ONLINE