Spain oo hawadeeda ka xirtay diyaaradaha Mareykanka ee ka qeyb qaadanaya dagaalka Iran

Spain ayaa xirtay hawadeeda diyaaradaha milatari ee Mareykanka ee ka qeyb qaadanaya weerarrada ka dhanka ah Iran, iyadoo ballaarisay xayiraad hore oo la xiriirtay adeegsiga saldhigyada milatari ee si wadajir ah loo maamulo.

Wasiirka Gaashaandhigga Spain, Margarita Robles, ayaa sheegtay in Madrid aysan oggolaan doonin in la isticmaalo saldhigyada milatari ama hawada dalka ee hawlgallada la xiriira dagaalka Iran. “Ma oggolaaneyno isticmaalka saldhigyada milatari ama hawada dalka falal la xiriira dagaalka Iran,” ayay u sheegtay saxafiyiinta.

Go’aankan ayaa ku qasbaya diyaaradaha milatari ee Mareykanka inay maraan waddooyin kale, inkasta oo duullimaadyada degdegga ah laga reebay xayiraadda. 

Wasiirka Dhaqaalaha Spain, Carlos Cuerpo, ayaa sheegay in tallaabadan ay ka tarjumeyso diidmada Spain ee dagaal si hal dhinac ah loo bilaabay isla markaana “ka hor imanaya sharciga caalamiga ah.”

Ra’iisul Wasaaraha Spain, Pedro Sánchez, ayaa marar badan dhaliilay dagaalka ay hoggaaminayaan Mareykanka iyo Israel, halka Donald Trump uu ku hanjabay tallaabooyin ganacsi oo aargoosi ah.