Trump: Iran waxay dib uga bilaabi kartaa barnaamijka nukliyeerka meelo cusub

Washington, USA – Madaxweynaha Mareykanka, Donald Trump, ayaa sheegay in dowladda Iran laga yaabo inay dib uga bilowdo barnaamijkeeda nukliyeerka meelo cusub, isagoo muujiyay walaac weyn oo ku saabsan damaca Tehran ee dhanka hubka nukliyeerka.

Trump ayaa tilmaamay in cunaqabataynta iyo cadaadiska uu saaray Iran aysan si buuxda u joojin qorshahooda, isla markaana ay suuragal tahay in Tehran ay hadda isku dayeyso inay barnaamijkeeda nukliyeerka dib uga sii waddo goob cusub si looga fogaado kormeerka caalamiga ah.

“Iran mar walba waxay ahayd halis dhanka nukliyeerka ah. Hadda waxay u muuqataa inay qorsheynayaan meel cusub oo ay ku hormariyaan barnaamijkooda,” ayuu yiri Trump.

Hadalka Trump ayaa imaanaya iyadoo ay taagan tahay xiisad sii xoogeysaneysa oo u dhaxeysa Iran iyo Israel, iyadoo Trump ka walaacsan suurtagalnimada in Iran ay hub nukliyeer samaysato. Bishii hore, Mareykanka ayaa duqeeyay saddexda xarun ee lagu bacrimiyo Macdanta Uranium-ka Iran.

Dowladda Iran ayaa marar badan sheegtay in barnaamijkeeda nukliyeerku yahay mid ujeedkiisu yahay nabad, balse dalal badan ayaan aaminsaneyn sheegashadaas.

GAROWE ONLINE