250 askari oo ka tirsan BIR-POL oo Bosaso soo gaarey

May 11, 2015 (GO)- Magaalada Bosaso waxaa soo gaarey ciidamo ka tirsan booliska birmadka kuwaasoo ka yimid magaalada Qardho ee xarunta gobolka Karkaar.

Ciidankan oo tiradiisu gaareyso 250 askari, waxay saraakiisha laamaha ammaanku sheegeen inuu ka qayb qaadan doono sugidda ammaanka Bosaso oo todobaadyadii u dambeeyey soo xumaanayey.

Fariisin kumeel gaar ah oo cidankaasi ka sameysteen duleedka magaalada ayaa waxaa warbaahinta kula hadlay taliyaha guud ee booliska Puntland Maxamed Siciid Jaqanaf.

Wuxuuna sheegay in ciidamadan oo soo qaatey tababar socdey muddo lix bilood ah lagu xoojin doono booliskii horey gobolka u joogey qaybna ka qaadaan doonaan sugidda amniga.

Jaqanaf ayaa dadweynaha ugu baaqey inay si dhow ula shaqeeyaan laamaha ammaanka soona gudbiyaan xog kasta oo sahleysa xoojinta nabadgelyada iyo qab qabashada dadka amniga khal khalka gelin kara.

GAROWE ONLINE