Al-Shabaab oo sheegatay weerar ka dhacay Bosaso
-
- Posted On 19-03-2016, 10:49AM
BOSASO- Kooxda Al-Shabaab ayaa sheegatay mas'uuliyadda weerar xalay ka dhacay degmada Bosaso ee xarunta gobolka Bari, kaasi oo lagu dilay mid ka mid ah ciidamada ammaanka gaar ahaan ilaalada Gudoomiyihii hore ee laanta Canshuuraha Beriga gobolka Bari, Ibrahim Maxamed Jige.
Shabaab ayaa weerarkan mas'uuliyaddiisa ka sheegay Idaacadda afkooda ku hadasha ee loo yaqaano Andulus.
Weerarkan oo ka dhacay Isgoyska Afar irdoodka ee laamiga dheer dhex mara magaalada Bosaso iyadoo ay fuliyeen kooxo hubaysan, waxaana sidoo kale lagu dhaawacay labo ruux oo midkood shacab yahay, halka kale uu ahaa ilaalada mas'uulkaasi.
Dhacdadan ayaa timi xilli ciidamadu ku jireen howlgal iyagoo ku sugnaa bar-kantarool.
Ilaa hadda arrinta kama hadlin dowladda Puntland, waxaase laamaha ammaan noo xaqiijiyeen inay wadaan baaritoon la xiriirta kooxda falkan gaysatay iyo qaabka u fuliyeen.
Maaha markii ugu horaysay koox katirsan Shabaab weerar ka gaystaan magalada Bosaso, balse waxay kusoo beegmeen xilli dagaal uu kasocda deegaanada xeebaha dhacay ee gobollada Nugal iyo Mudug.
GAROWEONLINE
