Bandhiga Sawirrada iyo Farshaxanka oo Garowe lagu qabtay

GAROOWE, Puntland- Waxaa sannadkii saddexaad magaalada Garoowe ee caasimadda Puntland lagu qabtay bandhiga Farshaxanka iyo sawirrada, waxaana kasoo qayb galay Madaxweyne ku-xigeenka Putland, xubno katirsan golayaasha dowladda, Siyaasiyiinta, Sawirqaadayaal kayimid gobollada Putland, farshaxamiistayaal iyo marti ka socotay qaybaha kala duwan ee bulshada.

Bandhigan oo xalay lagu qabtay xarunta PDRC, ayaa ujeedkiisa lagu sheegay sidii kor loogu qaadi lahaa xirfaha gacanta gaar ahaan sawirrada iyo farshaxanka.

Balqiisa Cabdirisaaq Abshir, oo ah gabadha ka dambaysa in saddex sano oo isku xiga barnaamijkan uu ka hirgalo Garoowe, ayaa sheegtay in fikradan ay uga danleedahay sidii kor loogu qaadi lahaa niyadda dadka wax sawira si dalka bilicdiisa iyo hormarkiisa kor loogu qaado.

Qaar kamid ah xubnihii lagu casuumay barnaaamijkan ayaa iyaguna xusay inay ku faraxsanyihiin hirgalintan [Puntland Art Fiar] iyagoo soo jeediyay in fikradan waddanka oo dhan laga hirgaliyo islamarkaana qaabkan laga ballaariyo.

Maxamed Cabdiraxmaan Farole oo kamid ahaa xubnihii madasha lagu casuumay ayaa ku baaqay in la dhiirigaliyo dadka isku xilqaamay inay ka shaqeeyaan hormarka islamarkaana wuxuu usoo jeediyay qaban-qaabiyaasha barnaamijkan inay kasii ballaariyaan heerka uu maanta joogo.

Madaxweyne ku-xigeenka Puntland oo shahaadooyin guddoonsiiyay sawirqaadayaashii goobta kusoo bandhigay sawirradooda, ayaa bogaadiyay qorshahan wuxuuna tilmaamay in sawirrku ku fadhiyo macno weyn islamarkaana uu hormar keenayo hadii sida wanaagsan looga faa'iidaysto.

GAROWE ONLINE