Barlamanka Puntland oo ka hadlay shidaal baarista Somaliland ee gobolka Sool

10 December, 2015(GO)-Xildhibaan Cali Dhagacadde oo ka mid ah mudanayaasha Barlamanka Puntland ayaa ka hadlay diyaaro ajaanib ah balse ku shaqaynaya qorsha shidaal baaris Somaliland ka waddo deegaano ka tirsan gobolka Sool.

Mudanaha, ayaa tilmaamay ina maalmahan degaano hoos yimaada Xuddun iyo Taleex laga soo sheegayay warar tilmaamaya in diyaaro la socdaan ciidamo dhulka ka samaynayeen baaritaan isla markaana qaadaneyeen macdan.

Maamulka Somaliland ayaa Xildhibaan Cali Dhagacade u sheegay inay ka waantoobaan daan daansiga ay ka wadaan deegaanada Puntland, wuxuuna shacabka ugu baaqay inay dalkooda ilaashadaan.
Dowladda Puntland ayuu u soo jeediyay inay qaadato doorkeeda dastuuriga ah.

Xaaladda qaybo ka mid ah gobolka Sool ayaa malmahan kacsanayd, kadib markii ay yimaadeen shirkad ajnabi ah oo ka socota maamulka Somaliland taaso qandaraas ku qaadatay inay shidaal baaris ka sameyso deegaano gobolkaasi ka mid ah.

GAROWEONLINE