Bur-bur ku yimi dhaqaalaha Is-kushuban [Dhagayso]
-
- Posted On 21-09-2015, 11:00AM
21 Septembar, 2015(GO)-Gudoomiyaha degmada Isku-Shuban ee gobolka Bari Maxamuud Ismaciil Ciise oo u waramayay Radio Garowe ayaa ka hadlay dhibaato ka dhacday degmadaasi.
Waxaa uu sheegay inay gubteen 22 ka mid ah beero ku yaallay Isku-Shuban, ka dib dab qabsaday mid ka mid ah.
Hal qof oo ka mid ah beeralayda ayaa falkaasi loo soo xiray, waxaana socda baaritaanno ku aaddan sida wax u dhaceen.
Maxamuud Ismacil ayaa sheegay in arrintani saamayn ku yeelatay in ka badan 300 oo qoys kuwaasi oo ku hanti beelay masiibada dhacday.
Dowladda Puntland iyo hay'adaha qaabilsan masiibooyinka ayuu sheegay Gudoomiyaha degmaada Isku-Shuban inay u gudbiyeen dhibka dhacay, waxaana dhawaan degmada imaan doona wufuud ka socota gobolka iyo xukuumadda Puntland si loo eego xaaladda degmada.
Beeraha gubtay waxa ku yaallay 6600 oo geed sida uu tilmaamay duqa Isku-Shuban kuwaasi oo isugu jiray geed miroodka noocyadiisa kala duwan.
Degmada ayaa caan ku ah geedka Timirta, waxaana bulshadu ku tirsanyihiin wax soo saarka beeraha.
GAROWEONLINE
