Dagaal ka bilowday Garacad Mudug [Dhagayso]
-
- Posted On 20-03-2016, 08:09AM
GARACAD- Waxaa goordhaweyd deegaan lagu magacaabo Dabakaro oo katirsan deegaanka Garacad gobolka Mudug ka bilowday dagaal xooggan oo u dhaxeeya ciidamada difaaca Puntland iyo mallayshiyaad la tuhunsanyahay inay katirsanyihiin Shabaab.
Sarkaal jiida hore ka dagaallamaya oo lagu magacaabo Low Cabdi Cad, ayaa Radio Garowe u xaqiijiyay in dagaalku socda, isagoo xilliga uu hadlayay la maqlayay rasaas xooggan oo la isweydaarsanayo.
Wuxuu tilmaamay in kooxdan kamidyihiin firxadkii kasoo cararay degmada Godob-jiiraan gobolka Nugal, isagoo xusay in khasaaro xooggan loo gaystay.
Dhinaca ciidanka wuxuu tilmaamay inaysan jirin wax khasaaro ah.
Deegaanka lagu dagaallamayo ayuu xusay inay tahay cadduun bannaan balse leh geedo yar yar oo gaa-gaaban, wuxuuna xusay inay dhawaan soo afjari doonaan mallayshiyadda dagaallamaya.
Dagaalkan ayaa qarxay xilli shalay deegaanka Garacad gaareen wasiirka Amniga Puntland iyo taliyaha guud ee ciidamada qalabka sida.
Wixii kasoo kordha dagaalkaasi dib ayaan idiin kasoo gudbin doonaan
GAROWEONLINE
