Deni oo ka goos-qabsadey ka qeybgalka shirka wadatashiga qaranka

Caasimada ku meelgaarka Koonfur Galbeed ee Baydhabo ayaa marti-gelinaysa wadaxaajoodyadan masiiriga ah.

GAROWE, Puntland - Saciid Cabdullaahi Deni ayaa diidey ka qeybgalka shirka madaxda dowladda federaalka iyo maamulada oo Baydhabo ay martigelineyso March 15, 2023, sidda uu ogaadey mareega Garowe Online.

Madaxweynaha Puntland ee muddo xileedkiisa ay bilooyinka uga hareen ayaa xaadiritaanka wadahaladan masiiriga ah ka door-bidey karaar-siinta doorashadda halka dhinac ah ee goleyaasha degaanka.

"Haddii doodiisu aysan ahayn mid shaqsiyadeed, danta Puntland waxay ku jirtaa in uu miiska wadahadalka geeyo qadiyadaha uu ka gadoodsan yahay," ayay warsidaha GO u sheegeen illo wareedyo.

Fahfaahino madax-banaan oo laga helay darafyadda ka shaqeynaya qaban-qaabadda wadaxaajoodka ayaa intaas ku daraya in Deni uu gaashaanka ku dhuftey soojeedino dhexdhexaadin gudaha iyo dibadda.

"Hogaamiyeyaasha kale ee maamulada iyo madaxda federaalka ayaa la filayaa in ay kasoo qeybgalaan kulankan oo ajandihiisu muhiim u yahay dowlad dhiska," ayuu raaciyey xubin kamid ah guddiga qabanqaabada.

Macluumaadka la helayo ayaa muujinaya in ajandaha shirkan ay kamid tahay qorshaha amniga qaranka oo uu ku jiro wajiga labaad ee howlgalada ka dhanka ah Al-Shabaab, iyo qabyo-tirka dastuurka Soomaaliya.

Deni ayaa ku dhawaaqay in xukuumadiisa ay hoos-u-dhigtey wadashaqeyntii kala dhaxeysay Villa Soomaaliya ka gadaal markii uu ka waayay dano dhaqaale iyo mid siyaasadeed oo uu ula shir-tagay madaxda federaalka.

GAROWE ONLINE