Duqii hore ee degmada Isku-shuban oo la diley

May 27, 2015 (GO)- Guddoomiyihii hore ee degmada Isku-shuban Cabdirisaaq Muuse Cartan ayaa galabta lagu diley inta u dhexeysa tuulada Carta iyo degmada Carmo ee gobolka Bari.

Dabley hubeysan ayaa jidka u galay mas'uulkaas iyagoo gaarigii u watey gaari kale ku hor gooyey kaddibna tacshiirad huwiyey.

Cabdirasaaq Cartan wuxuu markii la dilayey wadey qoyskiisa oo magaalada Boosaaso kasoo xagaa baxay kuna soo jeedey degmada Waaciye ee gobolka Karkaar.

Ilaa iyo hadda lama oga sababta ka dambeysa dilkan iyo weliba haybta dableyda weerarkaas fulisey, balse wararka hordhaca ah ee Garowe Online heleyso ayaa tibaaxaya in dilkaan ahaa mid la xiriira dilal ka dhacey degmada Isku-shuban 2013.

Cartan ayaa muddo lix sano ka badan soo ahaa duqa degmada Isku-shuban, wuxuuna xilkaas wareejiyey bilo kahor.

GAROWE ONLINE