Gaas: In la kordhiyo lacagta Dekedda Khasab weeye

GAROOWE, Puntland- Madaxweynaha Puntland Cabdiwali Maxamed Cali Gaas oo bixinayay waraysi gaar ah ayaa ka hadlay xaalada dekedda Boosaaso, duqaymo ka dhacay gobolka Bari iyo safarkiisii Ethiopia.

Gaas ayaa sheegay in socdaalkiisii Ethiopia uu ahaa mid ay ku jirto danta shacabka iyo Ganacsatada Puntland sidii ay suuq ugu heli lahaayeen badeecooyinkooda.

Wuxuu intaas ku daray in Madaxda Ethiopia ay isla soo qaadeen dagaalka Argagixisada islamarkaana soo kala saxiixday heshiis ku saabsan Ganacsiga iyo amniga.

Madaxweynaha ayaa isku xiray safarkiisa Ethiopia iyo qalalaasaha ka daagan Boosaaso isagoo sheegay inaysan macquul ahayn in fowdo la abuuro isaguna uu u dedaalayo ganacsiga Puntland.

Waxaa wax laga weydiiyay cabshada ganacsatada Boosaaso iyo in dowladdu garowshiyo ka bixin doonto wuxuuna ku jawaabay, "Lacagta waa la kordhinayaa sababtoo ah 336 Malyan oo dollar, marka in wax la kordhiyaa khasab weeye waayo qofku wuxuu maalgashaday waa inay wax uga soo noqdaan."

Duqaynta Diyaaradaha Maraykanku ka wadaan gobolka Bari ayuu sheegay inay sii socon doonaan islamarkaana lagu dilay mallayshiyaad katirsan Daacish, inkastoo uu xusay inuusan maqal waxyeello soo gaartay horjoogayaasha ururkaas.

Waraysigan oo ay BBC-du ka qaaday Gaas ayaa kusoo beegmay xilli muddooyinkii dambe aysan wanaagsanayn xaalada magaalada Boosaaso iyadoo ismaandhaaf u dhaxeeyo ganacsatada iyo dowladda.

GAROWE ONLINE