Madaxweynaha Puntland oo la kulmey wafti ka socda dalka Iran
-
- Posted On 04-09-2015, 10:17AM
Sept 4,2015 (GO)- Wafti ka socda saraakiil ku magacaaban safaarada dalka Iran ku leeyahay Somalia iyo hay'ada la yiraahdo Khumeini Foundation ayaa madaxweynaha dowlada Puntland kula kulmey magaalada Garowe.
Waftigaan oo kasoo dagey magaalada Galgalacayo ayaa aqalka madaxtooyada Garowe kula kulmey madaxweyne Gaas intii uu booqashada ku imaan xarunta gobolka Mudug.
Booqashada safarkaan oo laga qariyey saxaafada ayaa madaxweyne Gaas waxaa uu u saarey guddi ka kooban wasaarada arrimaha gudaha, Kaluumeysiga iyo agaasimihii hore ee cidiamada PMF Cabdinaasir Biixi.
Waftigaan iyo guddigii loo xilsaarey ayaa wararku sheegayaan iney u gudbeen magaalada Qardho iyo Bosaso halkasoo ay booqdeen xeryaha qaxootiga dalka Yamen.
Wararkaan ayaa sheegaya in xubnahaan ka socdey safaarada iyo hay'daan la yiraahdo Khumeyni Foundation ay balan qaadeen iney tageero u fidin doonaan qaxootiga dalka Yamen.
Dhinaca kale waftigaan ayaa xubnihii ka socdey wasaarada Kaluumeysiga Puntland kuwasoo uu hogaaminyey wasiir ku-xigeenka kala xaajoodey sidii loo sharciyeen lahaa doonyaha Iraaniyiinta kuwasoo Kaluumeysiga sharci dara ah ka sameeya xeebaha Puntland.
Dowlada Iran ayaa tan iyo intii uu bilowdey dagaalka ka socda dalka Yamen waxey kordhisay xiriirka ay la sameyneyso madaxda Somalida iyo ganacsatada gaar ahaan kuwa fadhigoodu yahay magaalada Muqdisho. Iran ayaa balanqaadeysa in hay'adaheeda khayriyaadka tageeraayaan shacabka Somalida.
Kulankaan madaxweynaha Puntland la qaatey waftigaan ka socdey Iran ayaa sidoo kale wararku sheegayaan iney balan qaadeen deeq waxbarasho oo dalka Iran siinayo ardeyda Puntland taasoo mudane Gaas aqbaley.
GAROWEONLINE
