Maraykanka oo kharash ku bixinaya tababarka ciidanka booliska Somalia

01 Octoer, 2015(GO)-Dowladda Maraykanka ayaa lacag gaaraysa 1 milyan oo doolar ku kharash garaynaysa tababar iyo qalabayn la siinayo ciidamada booliiska dowladda Federaalka Somalia iyo Puntland.

Shir lagu kala saxiixanayay hishiis ay wada gaareen labada dhinac, ayaa shalay ka dhacay magalada Nairobi ee xarunta dalka Kenya oo ay goob joog ka ahaayeen madax ka socota Dowladda Federaalka Somalia.

Taliyaha ciidanka booliiska Puntland Cabdirasaaq Maxamud Afgaduud oo waraysi siiyay Idaacadda BBC-da ayaa sheegay in arrintan looga dan leeyahay sidii kor loogu qaadi lahaa tayada ciidamada Puntland gaar ahaa booliiska.

Waxaa uu tilmaamay inay wadaan dadaalo lagu doonayo hagaajinta ciidanka ee dhanka tayada, aqoonta iyo qalabka.

Mar wax laga weydiiyay ujeedka kharashka intaa le'eg Maraykanku ugu bixinayo ayuu sheegay inaysan garan karin, balse ay ka raacayaan dantooda, wuxuuna ku tilmaamay inay qayb ka tahay taageero markasta uu siiyo wadamada saaxiibka la'ah.

Ciidanka la tababarayo, ayuu xusay Taliyuhu inay ka qayb qaadanayaa adkaynta amniga, joojinta tahriibta iyo Burcad Badeeda.

Afgaduud, ayaa dhawr jeer oo hore sheegay inuu tayayn doono ciidanka booliiska inta uu xafiiska joogo, waxaan tababarka ciidanka Puntland mid la mid ah la siin doona kuwa Somalia, sida lagu shaaciyay shir ka dhacay Nairobi.

GAROWEONLINE