Puntland: Cabdicasiis Koor oo loo magacaabay Agaasimaha W/Deegaanka
-
Wariyaha Garowe Garowe Online
- Posted On 17-12-2017, 08:29PM
GAROOWE, Puntland- Wareegto kasoo baxday xafiiska Madaxweynaha dowladda Puntland ayaa Agaasimihii hore ee wasaaradda Arrimaha Gudaha islamarkaana soo noqday duqa Caasimadda Garoowe loo magacaabay Agaasimaha Guud ee Wasaaradda Deegaanka Puntland.
Wareegto uu helay GO oo Madaxweyne Gaas kasoo baxday 16 December, 2017 ayaa mas'uulkan loogu magacaabay xilkan muddo kadib markii uu diiday inuu noqdo Agaasimaha wasaaradda Shaqada iyo Shaqaalah dowladda Puntland.
Booskaas waxaa horay u joogtay gabar lagu magacaabo Muno Daahir Dalmar, taasoo in muddo ah aan kasoo muuqan xarunta Wasaaradda iyadoo aan la ogayn sababta maqnaanshaheeda.
Muno ayaa markii hore wasaaraddaas lagu geeyay badal looga keenay W/Arrimaha Gudaha, dowladaha hoose iyo Hormarinta reer Guuraaga.
"Markuu Arkay Dastuurka dowladda Puntland, Markuu Arkay Aqoontiisa iyo Waayo-aragnimadiisa, markuu arkay talo soo jeedista Wasiirka Deegaanka, wuxuu Cabdicasiis Nuur Cilmi Koor u magacaabay Agaasimaha Guud ee Wasaaradda Deegaanka, Duurjoogta iyo Dalxiiska Puntland," ayaa lagu yiri warqad kasoo baxday Xafiiska Madaxweyne Gaas.
Cabdicasiis Koor ilaa hadda kama uusan hadlin xilka cusub ee loo magacaabay.
GAROWE ONLINE
