Puntland: Gorod oo la kulmay bulshada Gaalkacyo [Sawirro]
-
Wariyaha Gaalkacyo Garowe Online
- Posted On 04-02-2018, 11:40AM
GAALKACYO, Puntland - Taliyaha ciidamada xoogga dalka Soomaaliya, Jeneraal Cabdiweli Jaamac Gorod ayaa kulan gaar ah la qaatey bulshada magaalada Gaalkacyo, isagoo kala hadlay sidii la isaga kaashan lahaa nabad-gelyada magaaladaasi.
Gorod oo Su'aalo la xiriira amniga Gaalkacyo lagu waydiiyay kulanka ayaa ka warbixiyay halka ay marayso howsha Nabadaynta ay wadaan gudiyada Nabad galyada isku-dhafka ah ee Puntland iyo Galmudug.
Wuxuu sheegay inay meel wanaagsan u marayso dedaallada ku aadan nabadeynta Gaalkacyo iyo guud ahaan gobolka Mudug, islamarkaana ciidamada labada dhinac ay si hufan ay ugu wada-shaqeynayaan.
Taliyaha ayaa ugu baaqay shacabka, mas'uuliyiinta iyo Odayaasha Gaalkacyo inay la shaqeeyaan ciidamada isku-dhafka ah, ee loo xil-saarey nabadda magaalada, islamarkaana qeyb ka noqdaa xalka.
Jeneraal Gorod ayaa xusay in ay ka shaqeynayaan saraakiisha ciidamada inay meel dajiyaan ciidamada isku dhafka ee ka hawlgalaya gobolka Mudug kuwaas oo isugu jira Boolis iyo Milatari.
Gaalkacyo ayaa ah xudunta colaadda gobolka Mudug, taasi oo soo jiitamaysay mudo dheer, iyadoo isku dayo iyo heshiisyo badan oo dhanka nabada ah oo horey loo sameeyeen ay fashilmeen.
GAROWE ONLINE
