Puntland: Lacag laga joojiyay wasaarada waxbarashada
-
- Posted On 24-02-2016, 04:23PM
GAROWE- Midowga Yurub ayaa hakiyay lacag aan cadadkeeda la sheegin oo lagu taageeri jiray qaybta imtixaanaadka wasaaradda waxbarashada iyo tacliinta sare ee Puntland muddo ku siman 12-sano.
Madaxa Imtixaanaadka wasaaradda Waxbarashada iyo Tacliinta Sare ee Puntland, Axmed Maxamud Warsame "Saahid" ayaa cadeeyay inuu hakad ku yimi lacagtaasi, xilli uu maanta warbaahinta kula hadlay magalada Garowe caasumadda Puntland. Saahid, ayaa sheegay in wasaaraddu ku guul-darraysatay qaabkii EU-da looga dhaadhicin lahaa inay soo celiso taageerada waqtiga dheer, isagoo taa badalkeeda xusay in kharashaadkii dhabarka u ridatay wasaaraddu.
Arrintaasi, waxay keentay in la kordhiyo lacagihii laga qaadi jiray Ardayda ku jirta dugsiga sare fasalka 4-aad iyo dugsiga dhexe fasalka 8-daad, waxaana laga dhigay $20 halka markii hore bixin jireen $15.
GAROWEONLINE
