Puntland oo Ka Digtay Saameynta Isbedelka Cimilada iyo Faragelinta Dowladda Federaalka

Wasiirka Deegaanka iyo Isbedelka Cimilada ee Puntland, Mudane Maxamed Cabdiraxmaan

GAROWE, Puntland – Wasiirka Deegaanka iyo Isbedelka Cimilada ee Puntland, Mudane Maxamed Cabdiraxmaan, ayaa sheegay in isbedelka cimilada uu sababay xaalado daran oo aan la saadaalin karin, kuwaasoo horseeday dhamaanshaha khayraadka dabiiciga ah iyo dhibaatooyin ku habsaday bulshada ku tiirsan beeralayda iyo xoolo-dhaqatada, gaar ahaan marka biyaha iyo daaqa ay yaraadaan.

“Isbedelka cimiladu wuxuu sababay xaalado daran oo aan la saadaalin karin, taasoo si toos ah u saameysay nolosha bulshooyinka beeraleyda iyo xoolo-dhaqatada ah. Marka biyo iyo daaq la waayo, nolosha dadkan aad bay u adkaaneysaa,” ayuu yiri Wasiirka Deegaanka ee Puntland, Maxamed Cabdiraxmaan.

Dhanka kale, Wasiirka ayaa ka hadlay in khilaafyada siyaasadeed saameyn ku yeesheen hirgalinta mashaariicda lagula tacaalayo isbadalka cimilada.

“Faragelinta siyaasadeed ee Dowladda Federaalka ee Soomaaliya waxay saameyn ku yeelatay dadaallada looga hortagayo khataraha isbedelka cimilada,” ayuu yiri wasiirku.

Isbedelka cimilada ayaa noqday mid si weyn u saameynaya guud ahaan dalka Soomaaliya, iyadoo abaaro soo noqnoqda, fatahaado iyo kuleyl daran ay wiiqayaan noloshii dhaqameed ee dadka ku tiirsan xoolaha iyo beeraleyda.

Dowladda Federaalka iyo maamul goboleedyadu waxa ay wajahaan baahi degdeg ah oo ah in la sameeyo qorshe mideysan oo wax looga qabanayo dhibaatooyinka deegaanka iyo cimilada.

GAROWE ONLINE