Ciidamo mushaar la'aan ah oo gadood ka sameeyay Qardho
-
Wariyaha Garoowe Garowe Online
- Posted On 04-03-2018, 03:11PM
QARDHO, Puntland - Ciidamo katirsan dowladda Puntland ayaa maanta oo Axad ah gadood ka sameeyay magaalada Qardho, ee xarunta gobolka Karkaar kuwaasi oo ka cabanaya mushaar la'aan mudo bilooyin ah.
Qof ku sugan magaalada Qardho oo la hadlay Warsidaha Garowe Online, ayaa sheegay in Ciidamada ay la wareegeen xaruumaha Wasaaradda Maaliyadda iyo Bangiga Dhexe, iyagoo u diiday shaqaalaha inay galaan, taasi oo hakad gelisay shaqada Hay'adahaasi.
Saraakiisha hogaaminaysa Ciidamada gadooday, ayaa sheegay in aysan wax mushaar ah iyo xuquuq ka helin dowladda Puntland ee uu hogaamiyo Madaxweyne Cabdiweli Maxamed Cali "Gaas" toddobadii bilood ee la soo dhaafay.
Dowladda Puntland wali kama aysan hadlin gadoodka Ciidamada.
Ciidamada Puntland ayaa sanadkii tagey 2017 sidan oo kale dhowr jeer gadood uga sameeyay magaalooyinka Garoowe, Gaalkacyo iyo Boosaaso, iyagoo ka cabanaya mushaar la'aan.
Wixii kusoo kordha Gadoodka Ciidanka, kala soco Wararkeena dambe.
GAROWE ONLINE
