​Wasaaradda Caddaaladda oo ka tacsiyaysay geerida Cali Gar-gaar

GAROWE, Puntland- ALLAH ha u naxariistee, waxaa saaka magaalada Garowe ku geeriyooday Agaasimihii maamulka ee wasaaradda Caddaaladda Puntland, Cali Warsame oo loo yaqaanay Cali Gar-gaar.

Marxuumka ayaa u geeriyooday xanuun hayay muddo kooban, kaasoo markii dambe cusbitalka loo jiifiyay.

Agaasimaha wasaaradda Caddaaladda Puntland, Maxamed Cali Faarax oo la hadlay Radio Garowe, ayaa marxuumka Tacsi u diray, isagoo sheegay inuu ahaa shakhsi wanaagsan oo dadku jecelyihiin, kaasoo lagu xasuusan doono wax-qabad wanaagsan.

Wuxuu intaas ku daray inuu kamid ahaa dadkii lagu aas-aasay wasaaradda Caddaaladda Puntland, sannadkii 1998.

Agaasimaha ayaa Rabbi uga baryay inuu ka waraabiyo naxariistiisa caamka ah.

EEBBE naxariistii ha ka waraabiyee Cali Gar-gaar ayaa muddo dheer ka shaqaynayay wasaaradda.

GAROWEONLINE