Wasaaradda Deegaanka Puntland oo gaadiid siisey afar degmo
-
- Posted On 06-06-2015, 06:35AM
June 6, 2015 (GO)- Wasaaradda Deegaanka Puntland ayaa maanta gaadiid ku wareejisey afar degmo oo ka tirsan gobollada Karkaar, Nugaal, Mudug iyo Haylaan, kuwaasoo kala ah: Qardho, Eyl, Jarriiban iyo Dhahar.
Gawaaridan oo tiradoodu afar tahay islamarkaana noocoodu yahay Toyota Hilux waxaa ku deeqay Midowga Yurub oo soo marsiiyey Hay'adda Care International.
Mas'uuliyiin ka tirsan dowladda ayaa kasoo qayb galay xafladd lagula kala wareegayey gaadiidkaas oo ka dhacday isla xarunta Wasaaradda Deegaanka.
Ugu horreyn waxaa goobta ka hadlay Wasiirka Deegaanka Guuleed Saalax isagoo sheegay in gawaaridani hordhac u yahay kuwo badan oo loo qaybin doono degmooyinka. Wuxuuna intaas ku daray in afarta gaari ee maanta la bixiyey ay horay Wasaaradda Deegaanku u ballan qaadey.
Guddoomiyeyaasha gobollada Haylaan iyo Mudug oo iyaguna goobta ka hadlay ayaa u mahadceliyey Wasaaradda Deegaanka, waxayna ballan qaadeen in gawaarida lagu wareejiyey ay dhaqaaleyn doonaan islamarkaana looga faa'iideysan doono sida loogu talo galay.
GAROWE ONLINE
