Xil wareejin ka dhacday madaxtooyada Puntland ee Garowe

June 8, 2015 (GO)- Agaasimihii hore ee maamulka madaxtooyada Cabdimahdi Abshir Cismaan ayaa maanta si rasmi ah xilka ugu wareejiyey agaasimaha cusub Cabdinaasir Maxamuud Gurey.

Xaflad kooban oo loo qabtay xilwareejinta kana dhacday madaxtooyada Garoowe ayaa waxaa ka qeyb-galay Agaasimaha Guud ee Madaxtooyada  Deeq Sulaymaan Yuusuf, ku xigeenka agaasimaha guud  Cawil Xassan Daad iyo saraakiil kale oo ka tirsan madaxtooyada Puntland .

Cabdimahdi Abshir Cismaan ayaa madasha ka sheegay inuu si aad ah ugu faraxsan yahay xil wareejinta, wuxuuna agaasimaha cusub ku wareejiyey dhammaan dukumiintiyadii shaqad.

Agaasimaha guud ee madaxtooyada Deeq Sulaymaan Yuusuf iyo ku-xigeenkiisa Cawil Xasan Daad ayaa dhankooda si aad ah u soo dhaweeyey shaqada wanaagsan ee uu soo qabtay agaasimihii hore kuna booriyey agaasimaha cusub inuu dadaalka halkaas kasii wado.

GAROWE ONLINE