Xubno ka tirsan wasiirada cusub ee PL oo la dhaariyey

GAROWE June 17, 2015 (GO)- Waxa maanta xafiiska Madaxweynaha Puntland ee magaalo madaxda Garowe lagu dhaariyey afar wasiir oo kamid ah xubnihii loo magacaabey wasiirrada isku-shaandheynta lagu sameeyey.

Xafalad kooban ayaa lagu dhaariyey Wasiirka Amniga iyo DDR-ta Cabdi Xirsi Cali Qarjab, Wasiirka Maaliyadda Puntland Cabdullaahi Shiikh Axmed, Wasiirka Xanaanada Xoolaha Puntland Cabdi-jamaal Cismaan Maxamed iyo Wasiirka Beeraha iyo Waraabka Puntland Cabdullaahi Cali Xirsi.

Dhaarta kadib ayaa Madaxweynaha Puntland waxaa uu hambalyo u direy dhamaan wasiirada la magacaabey isaga oo u rajeeyey in ilaahey u sahlo shaqada loo magacaabey.

"waxaan idinkula dardaarmayaa inaad sida aad ugu dhaarateen dalkiina iyo dadkiina ugu shaqeysaan , daacad u ahaataan , wixii masuuliyadiina wax u dhimaya idinkana leexinaya ujeedooyinka , himilooyinka iyo waxa laydinka filayana wax u dhimaya oo idinka weecinayana ka leexataan ‘’ ayuu yiri Madaxweyne Gaas oo hadal ka jeediyey munaasabadaan. .

"24-ka saac inaad shaqeysaan baa laydinka rabaa , masuuliyad baa idin saaran intaas oo umadana waa idin sugaysaa , waa howl aad iyo aad u dhib badan waana muhiim in xilkiina aad gudataan" ayuu hadalkiisa raaciyey Madaxweyne Gaas.

GAROWEONLINE