Askari Muqdisho ku dilay Wiil dhalinyaro ah oo aroos ku jiray
-
Wariyaha Muqdisho GAROWE ONLINE
- Posted On 18-03-2019, 11:52AM
MUQDISHO, Soomaaliya - Askari katirsan ciidamada booliska dowladda Federaalka ah ee Soomaaliya ayaa shalay gelinkii dambe ku dilay magaaladda Muqdisho wiil dhalinyaro ah, oo ku jiray bisha balabka [Aroos].
Cabdiwaaxid Jibriil Afrax oo da'da 20-tameeyadda ku jiray ayaa lagu toogtay Isgoyska Taleex ee degmada Hodon, waxaana Askariga falkan geystay la sheegay inuu goobta ka baxsaday.
Marxuumka ayaa watey Mooto Bajaaj, taasoo uu nolosha qoyskiisa ku maareyn jiray, waxaana wararku ay sheegayaan in xilliga la dilayay ay wadada u xirnayd ciidamada dowladda Soomaaliya.
Qoyska Cabdiwaaxid ayaa sheegay in Wiilkooda uu ku jiray maalintii saddexaad ee arooskiisa, waxayna ka dalbadeen dowladda in Askariga dilay lasoo qabto islamarkaana la marsiiyo cadaaladda.
Waa dilkii ugu dambeeyay oo wadiyaasha bajaaj-ta loogu geysto Muqdisho, iyadoo laamaha amaanka caasimadda ay ka gaabiyeen inay kahor tagaan falalkan dilka ah.
GAROWE ONLINE
