Baarlamaanka KG oo codka kalsoonida u qaadaya wasiirada cusub
-
WARIYAHA MUQDISHO GAROWE ONLINE
- Posted On 27-02-2019, 06:24AM
BAYDHABO, Koonfur Galbeed - Xildhibaanada Gollaha Wakiilada ee Koonfur Galbeed ayaa lagu wadaa in Arbcada maanta ah fadhi aan caadi ahayn ku yeeshaan xaruntooda magaaladda Baydhabo, caasimada KMG dowlad goboleedkaasi.
Fadhigaan oo la rajeynayo in ay soo xaadiraan inta badan mudanayaasha Aqalka ayaa waxaa la filayaa in uu shir gudoomiyo Afhayeenka Gollahaasi, Cabduqaadir Shariif Sheekhunaa Maye, oo ay wehliyaan ku xigeenadiisa.
Ajendaha kulanka ayaa ah ansixinta xukuumada cusub ee uu soo dhisay Madaxwayne Cabdicasiis Lafta Gareen, kaasi oo wasiirada horgeyn doona sharcidejiyaaha si ay codka kalsoonida u siiyaan.
Lafta Gareen ayaa sidoo kale qorshuhu yahay in uu Xildhibaanada u mariyo Barnaamijjka siyaasadeed ee xukuumadiisa kaasi oo ay dooneyso in ay ku shaqeyso mudada ay xafiiska joogaan.
La dagaalanka Al-Shabaab, siyaasad loo dhan yahay, horumarinta degaanka iyo dhisitaanka ciidamada ayaa la odrasayaa in ay qayb ka noqon doonaan Barnaamjijka siyaasadeed ee xukuumada Lafta Gareen.
13-kii bishaan Febraayo ayey ahayd markii uu Lafta Gareen si rasmi ah u dhameystiray Gollihiisa Wasiirada oo ka kooban wasiiro iyo wasiiro ku xigeeno, iyada oo aaney ku jirin wasiiru dowlayaal.
GAROWE ONLINE
