Bandow Lagu Soo Rogay Baydhabo Xilli Amnigu Sii Xumaanayo

BAYDHABO, Soomaaliya — Maamulka Koonfur Galbeed garabka Aadan Madoobe, ayaa bandow kusoo rogay magaalada Baydhabo, iyadoo la xaddiday dhaqdhaqaaqa dadka iyo gaadiidka kadib salaadda Maqrib, kaddib dagaalladii dhawaan magaalada ka dhacay.

Wasiirka Amniga Koonfur Galbeed, Isaaq Maxamed Korsaa, ayaa Arbacadii sheegay in bandowga uu qeyb ka yahay tallaabooyin lagu xoojinayo amniga magaalada, xilli xaaladda amni ay u baahan tahay feejignaan dheeraad ah.

Wasiirka ayaa shacabka ugu baaqay inay u hoggaansamaan awaamiirta ciidamada ammaanka, isagoo sheegay in dhaqdhaqaaqyada aan daruuriga ahayn aan la oggolaan doonin marka salaadda Maqrib la tukado kadib.

“Ilaahay idankiis, awaamiirtan waxaa looga gol leeyahay amniga guud, waxaana muhiim ah in ammaanka lagu xaqiijiyo iskaashi iyo dadaal wadajir ah,” ayuu yiri Korsaa.

Ciidamada ammaanka ayaa sidoo kale lagu amray inay si gaar ah diiradda u saaraan sugidda kala dambeynta gudaha magaalada, iyadoo wasiirku sheegay in xaaladda amni ee Baydhabo ay u baahan tahay kormeer iyo feejignaan joogto ah.

Bandowga ayaa ku soo beegmaya iyadoo Baydhabo ay dhawaan ka dhaceen dagaallo cusub oo ay ku lug lahaayeen ciidamo daacad u ah madaxweynihii hore ee Koonfur Galbeed, Cabdicasiis Xasan Maxamed Laftagareen. Dagaalladan ayaa noqday markii saddexaad ee tan iyo 17-kii Agoosto uu magaalada ka dhaco dagaal culus.

Colaadda ayaa saameyn ku yeelatay shacabka, iyadoo sidoo kale ay hakad ku yimaadeen dhaqdhaqaaqyadii ganacsi iyo nololeed ee magaalada.

Hay’adda Dhakhaatiirta Aan Xuduudda Lahayn (MSF) ayaa sheegtay in 94 qof oo dhaawacmay loo daweeyay kadib dagaalladii 17-kii Agoosto, kuwaas oo ay ku jireen 29 haween ah iyo 20 carruur ah. Afar qof ayaa ku dhintay dagaalladaasi.

Dagaallo kale oo dhacay 3-dii Sebtembar ayaa sababay in 71 qof oo dhaawac ah la geeyo Isbitaalka Gobolka Bay, sida ay sheegtay MSF. Dadka dhaawacmay waxaa ku jiray 15 haween ah iyo 12 carruur ah, halka hal qof uu ku dhintay dagaalkaasi.

Xaaladda Baydhabo ayaa weli ah mid xasaasi ah, iyadoo dhinacyada siyaasadda iyo ciidamada isku haya magaalada ay ku kala aragti duwan yihiin maamulka iyo mustaqbalka siyaasadeed ee Koonfur Galbeed.

GAROWE ONLINE