Booliska Soomaaliya oo sheegay inay qabteen nin halis ah oo kasoo baxsaday G/Hiiraan

MUQDISHO — Ciidamada Booliska Soomaaliya ayaa sheegay in saraakiil ka tirsan waaxda dambi-baarista ee CID-da ay qabteen nin lagu eedeeyay inuu geystay weerar loo adeegsaday mindi oo sababay dhimasho iyo dhaawac kana dhacay gobolka Hiiraan ee bartamaha Soomaaliya.

Booliska ayaa sheegay in ninka la qabtay lagu magacaabo Cabdifataax Shafici Daahir, kaasoo lagu eedeeyay inuu dilay Cali Faarax Daahir oo 60 jir ahaa, isla markaana dhaawacay nin kale degmada Halgan toddobaadkii hore.

Sida ay sheegeen saraakiisha ammaanka, eedeysanaha ayaa ka baxsaday goobta dhacdadu ka dhacday kadib weerarka, isagoo la rumeysan yahay inuu isku dayay inuu ka dhuunto ciidamada ammaanka.

Ciidamada CID-da ayaa sheegay inay ugu dambeyn ku qabteen deegaanka Ceelmacaan, kadib baaritaanno iyo dabagal ay sameeyeen.

Booliska Soomaaliya ayaa sheegay in baaritaannada kiiska ay weli socdaan, iyadoo la filayo in eedeysanaha la horgeeyo maxkamad marka ay soo dhamaadaan baaritaannada.

GAROWE ONLINE