Ciidanka DF iyo AMISOM oo "iska caabiyey" weerar lagu soo qaadey

JOWHAR, HirShabelle – Mas'uuliyiin ayaa shaaca ka qaadey in ciidamada dowladda iyo kuwa AMISOM ay iska caabiyeen weerar lagu qaadey saldhigooda.

Xerada la beegsaday ayaa ku taala nawaaxiga degaanka Ceel-geelow oo 18 KM dhanka waqooyi kaga aadan magaaladda Balcad.

Maleeyshiyaad ka tirsan Al-Shabaab ayaa waxaa la sheegay in ay ka dambeeyaan duulaankaas "dhicisoobay".

Illo degaanka ah ayaa xaqiijiyey in weerarka kadib ay heehaabayeen degaanka diyaarado noocaan aan duuliyaha lahayn ah.

Diyaaradaha ayaa la xaqiijiyey in ay baadigoobayeen dagaalameyaasha gulufka kusoo qaadey fariisinka ciidamada huwanka ah.

Maamulka degaanadaas ayaa waxay guulo ka sheegteen dhacdadaas. Dhanka kale, ma jiro wax war ah oo Al-Shabaab kasoo baxay.

Weerarkaan ayaa yimid maalmo kadib markii la dilay Baashiir Qoor-qaab oo ahaa sarkaal xilal muhiim ah u hayey xoogaga gacansaarka la leh Al-Qaacida.

GAROWE ONLINE