Ciidamadda Soomaaliya oo Al-Shabaab ka qabsaday degaano horleh
-
WARIYAHA MUQDISHO GAROWE ONLINE
- Posted On 02-12-2019, 07:15AM
BAARDHEERE, Jubaland – Taliska Ciidamadda Soomaaliya ayaa maanta oo Isniin ah ka warbixiyey howlgalo ay ka sameeyeen degaano dhaca gobolka Gedo ee koonfurta wadanka dhaca Geeska qaaradda hodanka ah ee Afrika.
Abaanduulaha Ururka 49aad Guutada 1-aad qeybta 43aad, Xidigle Maxamed Weli Cabdullaahi Xersi ayaa xusay in ay xorreeyeen tuulooyin horleh.
Mr Xersi oo la hadlay warbaahinta milatariga ayaa caddeeyay in ay la wareegeen gacan ku haynta degaanadda Reydab iyo Daar Macalin.
"Degaanadan aan qabsanay waxaa kuwa Istaraatiiji ah, waxayna argagixisadda ka wadeen dhibaateynta shacabka," ayuu hadalkiisa raaciyey.
Labadan degaan ayaa qiyaastii 40 KM u jira magaaladda Baardheere, halkaas oo ciidamadda dowladda iyo kuwa AMISOM ay ku sugan yihiin.
"Meelaha aan qabsanay waxaa ku jira fariisimaha argagixisadda. Qabsashadeena waxay timid dagaal," ayuu ku daray sarkaalka, isaga oo aan soo hadal-qaadin khasaaraha labadda dhinac.
Marka laga soo tago sheegashadda ciidamadda Soomaaliya, ma jiro wax war ah oo kasoo baxay dhanka dagaalameyaasha Al-Shabaab.
Muddooyinkii u dambeeyay ciidamada Soomaaliya ayaa waxay gobolada dalka ka wadeen howlgalo baaxad leh oo ururka Al-Shabaab looga saarayo meelaha baaqiga ku ah gacantooda kahor doorashada 2020-21 ee qofka iyo codka ah.
GAROWE ONLINE
