Dad shacab ah oo lagu dilay duleedka Muqdisho [Fahfaahin]

MUQDISHO, Soomaaliya - Ugu yaraan lix ruux oo shacab ah ayaa la xaqiijiyay in lagu dilay duleedka magaalada Muqdisho, ee caasimadda Soomaaliya maanta oo Talaado ah.

Goobjooge la hadlay Warsidaha Garowe Online ayaa sheegay in dadkan ay saarnaayeen Gaari HOMY ah [Caasi], ay dabley hubeysan kala degeen Gaariga xilli ay marayeen degaanka Lafoole, kadibna ay toogasho ku dileen.

Dadka la dilay oo ka yimid dhanka Afgooye, ayaa waxa ay ahaayeen Odayaal dhaqameed, sida ay xaqiijiyeen dadka degaanka, kuwaasoo saddex kamid ah ay ahaayeen walaalo hal qoys kasoo wada jeeda.

Falkan naxdinta leh ayaa la ogeyn sababta ka dambeysa iyo cida geysatay, iyadoo dadka degaanka Lafoole ay sheegeen in koox afka soo duubtey ay fuliyeen, kuwaasoo goobta ka baxsadey kahor inta aysan ciidamada dowladda soo gaarin.

Dilka dadkaan oo ka dhacay inta u dhaxeysa degaanada Xaawo Cabdi iyo Lafoole, ayaa la sheegaya in uu salka ku hayo aano qaabil, balse ma jirto faahfaahin in taas ka badan oo saraakiisha amniga degaanka ay bixiyeen.

GAROWE ONLINE