Diyaarad dhaawacyo sidday oo ka degtay magaaladda Muqdisho

MUQDISHO, Soomaaliya – Ku dhowaad 15 askari oo ku dhaawacmay dagaal ay shalay Al-Shabaab kula galeen degaanka Abal oo 18 KM u jira degmada Xudur ee gobolka Baay ayaa maanta laga dejiyey garoonka Muqdisho.

Saraakiil ka tirsan milatariga Soomaaliya ayaa u sheegay warsidaha Garowe Online in ciidamadda oo la geeyay Isbitaalada ay maamusho dowladda federaalka ah ay qaarkood dhaawacyadoodu yihiin kuwa "aad u culus".

Dhaawacyadda ayaa la tibaaxay in qaarkood ay kasoo gaareen dhanka lugaha iyo qeybaha sarre ee jirka ayna ku jirto rasaasta ama xabadaha.

"Waxaa Muqdisho loogu soo qaadey maadaama xaaladooda wax looga soo qaban-waayey caasimadda ku meelgaarka Koonfur Galbeed ee Baydhabo, halkaas oo qaar kale looga soo tagay," ayuu yiri midkood.

Dagaalkii shalay barqadii ka dhacay degaanka Abal ee gobolka Baay oo ahaa mid xoogan ayaa lasoo wariyey in uu geystay khasaaro isugu jira dhimasho iyo dhaawac oo soo kala gaarey darafyadda diriray.

Taliska Ciidamadda Soomaaliya oo aan soo hadal-qaadin waxyeeladda dhankooda ah ayaa tibaaxay in ay dileen 20 Al-Shabaab kamid ahaa.

Illaa iyo haatan, maleeyshiyaadka gacansaarka la leh shabakadda argagixisadda ah ee Al-Qaacidda ayanan wali war kasoo saarin falkaas.

Xaaladda goobtii lagu dagaalamay ayaa saacadihii lasoo dhaafay ah mid degan. Wararkii ugu dambeeyay ee ka imaanaya waxay tilmaamayaan in dhinacyadda ay wadaan dhaqdhaqaaqyo ciidan oo cabsi gelinaya shacabka caasimada

GAROWE ONLINE