Dowladda Federaalka Soomaaliya oo digniin culus u dirtay Kenya

MUQDISHO, Soomaaliya - Dowladda Federaalka ah ee Soomaaliya ayaa maanta oo Arbaco ah waxay soo saartay war-saxaafadeed ka dhan ah dhigeeda Kenya.

Bayaanka oo ka yimid Wasaarada Warfaafinta ayaa xukuumadda Nairobi loogu digay "faragelinta siyaasadeed oo ay ku sameyneyso arrimaha waddanka".

Qoraalka ayaa lagu sheegay "in khilaafyadda ka dhaxeeya labada dowladood ay jiraan wadiiqooyin sharci ah oo lagu xalin karo sidda kiiska badda".

Dacwadda badda, sidda ku cad warqadda, "waxay Soomaaliya ku dhegan tahay in loo dhaafo maxkamad oo laga war-sugo go'aankeeda".

Kenya ayaa lagu waaniyey in ciidamadeeda AMISOM "aysan u adeegsan arrimaha siyaasadeed iyo khalkhalgelinta amniga gudaha Soomaaliya".

"Dowladda federaalka Soomaaliya waxay mar walba raadineysaa daris wanaag, ixtiraam iyo nabad kuwada noolaanshiyo," ayuu raaciyey qoraalka.

Ugu dambeyntii, xukuumadda Muqdisho ayaa ku adkeysatay "in aysan aqbali doonin faragelin iyo khalkhal abuuris aanan ku jirin maslaxada gobolka iyo dadka".

Hoos ka akhriso qoraalka

GAROWE ONLINE